5. ఆంధ్రభాషకి 55 వర్ణాలున్నాయి.

[ప్రౌఢవ్యాకరణం. సంజ్ఞాపరిఛ్ఛేదం సూత్రం - 1]

ఆంధ్రభాషకు వర్ణంబు లేఁబదియైదు.

ఆంధ్రభాషకి 55 వర్ణాలున్నాయి.

అ ఆ ఇ ఈ ఉ ఊ ఋ ౠ ఌ ౡ ఎ ఏ ఐ ఒ ఓ ఔ అం అఁ అః క ఖ గ ఘ ఙ చ ౘ ఛ జ ౙ ఝ ఞ ట ఠ డ ఢ ణ త థ ద ధ న ప ఫ బ భ మ య ర ల వ శ ష స హ ళ

పరవస్తు చిన్నయసూరిగారి బాలవ్యాకరణం ఆవిర్భవించిన తరువాత బహుజనపల్లి సీతారామాచార్యులుగారు ప్రౌఢవ్యాకరణం అని మరొక వ్యాకరణగ్రంథం వ్రాసారు. బాల వ్యాకరణంలో కొన్ని విషయాలలో అసమగ్రత ఉన్నదని భావించి ఆ లోటుపాట్లను పూర్తిచేయటానికి బహుజనపల్లివారు ప్రౌఢవ్యాకరణం వ్రాసారు. మనం వీలైన చోట్ల ఈ వ్యాకరణగ్రంథం నుండి కూడా నేర్చుకుందాం.

ఈ ప్రౌఢవ్యాకరణం లోని సూత్రం బాలవ్యాకరణం సంజ్ఞాపరిఛ్ఛేదంలో ఉన్న మూడవ, నాలుగవ సూత్రాల సమాహారం. అంటే ఆ సూత్రాల కలగలుపు అన్న మాట. మొత్తం వర్ణమాలను ఇక్కడ పట్టిల రూపంలో చూడండి.

అ	ఆ	ఇ	ఈ	ఉ	ఊ	ఋ	ౠ	ఌ	ౡ
ఎ	ఏ	ఐ	ఒ	ఓ	ఔ	అం	అఁ	అః

క	ఖ	గ	ఘ	ఙ
చ ౘ	ఛ	జ ౙ	ఝ	ఞ
ట	ఠ	డ	ఢ	ణ
త	థ	ద	ధ	న
ప	ఫ	బ	భ	మ

య

ర

ల

వ

శ

ష

స

హ

ళ

ఈ‌ పట్టిక ప్రకారం తెలుగులో అచ్చులు 19.  హల్లులు 25 +2++ 9 = 36

అచ్చులూ హల్లులూ కలిపి మొత్తం వర్ణాలు 19 + 36 = 55

ఈ సూత్రానికి బహుజనపల్లివారి వివరణ ఈ విధంగా ఉంది.

1. ౡకార గ్రహణము సంస్కృత ప్రాకృత భాషా వ్య్తాకరణజ్ఞుల సమ్మతము. అయ్యది మంత్ర శాస్త్ర ప్రసిధ్ధము..

2. యవలల వలె రేఫంబును ప్రయత్నభేదంబుచే ద్వివిధంబు గాన శబ్దశాసనాదులచేత నలఘురేఫము వర్ణాంతరముగా గ్రహింపబడదయ్యె.

3. క్షకారము సంస్కృతవ్యాకరణముల యందును, నిఘంటువుల యందును, షాంతపద మధ్యమునందుఁ బఠింపఁబడుటం జేసి యది వర్ణాంతరము గాదు; సంయుక్తాక్షరమని తెలియవలయు. 

మనం క్రిందటి టపాలోనే ఈ క్రింద చెప్పిన మాటలు చదువుకున్నాం.

ౡ అనే ఏకాక్షరశబ్దం సంస్కృతంలో ఉంది కాని తెలుగులో లేదు. ఐటె దీనిని తెలుగు వర్ణమాలలో ఎందుకు చేర్చుకున్నట్లు అన్న ప్రశ్న వస్తుంది తప్పకుండా. ఈ ౡకారము సంసృత వ్యాకరణంలో ఉంది. ప్రాకృత వ్యాకరణం లోనూ‌ఉంది. ఈ వర్ణం కేవలం మంత్రశాస్త్రంలో తప్ప ప్రయోగంలో లేదు. అక్కడ అవసరం కాబట్టి సంస్కృతవర్ణమాలలో ఉంది.  కవులు కావ్యారంభంలో మాతృకాపూజచేయటానికి ఈశాన్యమూలను వ్రాయవలసిన అచ్చుల సమామ్నయంలో ఈ వర్ణమూ ఉంది కాబట్టి దీనికి సంస్కృతంలో ఉన్నట్లే తెలుగులో కూడా ఒక అక్షరరూపం ఇవ్వవలసి వచ్చింది. అంతకంటే ఈ వర్ణానికి విశేషప్రయోజనం ఏమీ లేదు.

య ర ల వ లను గురించి లఘువులూ  అలఘువులూ అని రెండు రకాలున్నాయి. వీటి గురించి బాలవ్యాకరణం 18వ సూత్రంలో వస్తుంది.  ఈ విషయం దృష్టిలో ఉంచుకొని వర్ణమాలలో శకటరేఫం అంటే నండి ఱ చేర్చలేదు. ఇది సూరి గారు కొత్తగా చేసిన వర్గీకరణం కాదు.  నన్నయగారు చేసినదే.

క్షకారం ఒక వర్ణం కాదు. సంయుక్తాక్షరం. బహుజనపల్లివారు క్షకారం ఎందుకు ప్రత్యేకమైన వర్ణంగా వర్ణమాలలో చేరదో చెప్పారు. (క్షకారం వర్ణమాలలో ఉందనే వాదన కూడా ఉంది.) 

వర్ణమాలలోని కొన్ని అక్షరాల గురించి విడిగా ఒక టపాలో చదువుకుందాం. ప్రస్తుతానికి వర్ణమాల ఎలా ఉన్నదని వ్యాకరణం చెబుతున్నదీ తెలుసుకుంటే చాలు.